Steppe and World баспа үйінің басшысы Раиса Сайран Қадырқызымен кездесу

• 0
• Оқылған саны: 1182

Steppe and World баспа үйінің басшысы Раиса Сайран Қадыр арнайы атбасын бұрып Қабиболла Сыдиықов атындағы Маңғыстау облыстық әмбебап кітапханаға келіп, облыстық мәдениет басқармасының басшысы Пәния Оналбайқызының және қала мектеп кітапханашыларының қатысуымен отандық  кітап нарығы, Хәрри Поттер феномені мен еліміздегі әйел басшы туралы стереотиптерге қатысты өз ойын ортаға салды

- Қазақстанға 2016 жылғы кезекті сапарымда балаларыма, туыстарыма базарлыққа қазақ тілінде шыққан әлем әдебиетін таппай, таң қалдым (бұл жайында сұхбаттарымда жиі айтамын). Жырақта жүргенде елдегі жағдайға қатысты көзқарас басқаша болып жатады ғой. Сонда қазақ балалары бестселлер болған, танымал заманауи әдебиетті қалай оқиды деп ойланғаным рас. Шынын айту керек, осы уақытқа дейін елімізде қазақ кітап нарығы деп айтатындай нарық болмады. Мемлекеттік тапсырыспен классикалық әдебиетті шығаратын ірі баспаларды ескермегенде, нарық Ресейден шыққан орыс кітаптарынан тұрды. «Атамұра», «Алматы кітап», «Фолиант» баспалары көбіне мемлекетпен тікелей, яғни B2G (business-to-government) форматында жұмыс істеп келеді. Ал B2C (business-to-consumer) форматындағы жұмыс көп уақыт пен қаражатты талап етеді. Ондай күш-қуат пен уақыт бөлуге баспа үйлерінің біразы мүдделі болмады деп ойлаймын.

Осының бәрін зерделей келе, өз баспамды ашу керек деген идеяға тоқталдым, бұл 2016 жыл болатын. Баспа 2017 жылы тіркелді, ал алғашқы кітап – Джулия Дональдсонның «Ақын қояны» («The Rhyming Rabbit») 2018 жылы шықты. Қарап отырсаңыз, идеяның туындауы, баспа үйінің тіркелуі мен алғашқы кітаптың жарыққа шығуы екі жылды қамтыды. Меніңше, аз уақыт емес.